Fandom

Interlingua Wiki

Le Systema Romanic

9 806paginas in
iste wiki
Add New Page
Discussion0 Share

INTERLINGUA ROMANICA

Lingua International - Le Systema Romanic

Le prime lingua artificial que io ha cognoscite, ante multe annos, esseva Esperanto. Apparentemente facile (16 regulas grammatical solmente), le creation de Lazaro L. Zamenhoff faceva forte impression super mi spirito idealista: in varie partes del mundo, mesmo in le distante e millenari China, on jam scribeva e parlava ille idioma neutre (non pertinente a ulle populo o nation), que permitteva communication international e diffusion cultural in nivello de equalitate a tote su practicantes. Le movimento del Verde Stella habeva producite vaste litteratura - alora io succedeva acquirer, inter multe obras de tote specie, etiam le Biblia in Esperanto (La Sankta Biblio) - e publicava revistas como El Popola Chinio, al qual io me abonava durante un par de annos.

Con le passar del tempore, mi enthusiasmo pro Esperanto dispareva, nam, malgrado le intense propaganda circum tal idioma, illo non attingeva le nivello de acceptation, que il esseva de expectar, como effective vehiculo de communication sin frontieras.

In april de iste anno 2007, io discoperiva Interlingua, un idioma non natural ma multo minus artificial que Esperanto e que io poterea practicar immediatemente, non solmente per colliger del Internet material didactic, de lectura, registrationes vocal (como le excellente lectiones per Ingvar Stenström), etc., ma anque per scriber messages a foros como *Interlng* e per ibi leger le messages de altere membros. Isto ha essite un experientia vermente belle, e io faceva rapide progressos in le practica de Interlingua, tanto que pauc menses post mi debut io acceptava (audacemente, sin dubita) participar con Bruno Zani in le revision (e versification) de su traduction del Inferno, de Le Divin Comedia, per Dante Alighieri.

Ma lo melior esseva ancora pro evenir. In septembre, io faceva mi prime contacto con Romanica e le surprisa esseva enorme: il non se tractava de un nove idioma, non del toto; iste esseva le mesme Interlingua que io jam cognosceva, con alcun - que nos dice assi - complementos concernente, principalmente, le flexiones nominal e verbal. Al initio de octobre io inaugurava mi sito http://karlosasantos.googlepages.com , cuje *homepage* se intitula ROMANICA e ubi io ha passate a publicar materias super le lingua Romanica, naturalmente, ma anque super Interlingua e, plus recentemente, Ido e Interlingue. (Il es importante dicer que al traduction in Interlingua, de Le Divin Comedia, que es publicate in ille sito, esseva addite le version in Romanica.)

Iste labor, que me permitte frequente studio comparate de iste idiomas - specialmente Interlingua, Interlingue e Romanica -, me ha monstrate e demonstrate que al minus iste tres (Ido, le Esperanto reformate, es un altere caso), io repete, Interlingua, Interlingue e Romanica constitue un mesme e unic systema, pro non dicer un mesme lingua international.

Mi maestro e grande amico Josu Lavin vade ultra. Ille es de opinion que:
a) Interlingua es un forma simplificate del Lingua Romanica Commun Unificate;
b) Interlingue (ex-Occidental) es un forma arbitrarimente alterate del lingua commun unificate simplificate;
c) le linguas romanic (espaniol, portugese, francese, italiano, etc.) son, ya, unificate, ma non commun (non pertine al communitate romanic, como un toto);
d) Romanica imbracia tote le anteriores. Isto vole dicer que illes qui scribe in ia, ie, es, pt, fr, it, etc. scribe de facto in ra (Romanica).

E Josu conclude (in su message, de ubi io transcribe le essentia del paragrapho precedente): "Romanica, que es un insimul de linguas, habe un forma commun unificate que totes nos cognosce, e in le qual io scribe nunc."

Pro terminar, io dicerea que io habe un sonio (con permisso de Martin Luther King): me facerea multo felice vider un die - si tosto como possibile - tote le communitate romanic (espanioles, portugeses, brasilianos, franceses, italianos, rumanos, *interlinguaistas*, *occidentalistas*, *romanichistas*, etc.) unite circum le ideal de facer de iste systema a que io allude un effective e exuberante Lingua International.

Carlos Alberto Santos (21.12.2007)

Commentario de Josu Lavin

Nostre amico Carlos Alberto Santos ha exponite, a mi aviso, perfectemente qual cosa es le Systema Romanic.

Il serea possibile un Systema Germanic?
Si.
E un Systema Slavic?
Si.
E un systema ...-ic?
Si.

Tal systemas, regrettabilemente pro illos, non serea le Lingua International.

Le unic systema linguistic international es le Systema Romanic, le qual etiam pote esser appellate Systema Grecolatin o Systema Neolatin.

Il es un facto vermente magnific que le Systema Romanic habe duo systemas grammatic: Interlingua & Romanica.

Interlingua da le opportunitate a non romanophonos de parlar e scriber in Lingua International correctissime sin necessitate de studiar flexiones e verbal e nominal que poterea esser un obstaculo insalvabile pro illes.

Le anglese, le qual es un systema in principio germanic, ha devenite Lingua International gratias al immense influentia del Systema Romanic. Angleses non senti necessitate de studiar Interlingua, Romanica o qualcunque lingua romanic major, perque jam parla Lingua International ben que phoneticamente disguisate e mixturate per e con elementos germanic.

In mi opinion, le romanophonos non deberea facer le effortio de parlar in anglese, si on non videva un effortio simile pro apprender alicun lingua del Systema Romanic per parte de anglophonos. Nonobstante, le romanophonos age intelligentemente e illes studia anglese e altere linguas.

On deberea arrivar a un puncto de incontro ubi romanophonos e anglophonos pote comprender le unes le alteres parlante cata uno in su proprie lingua.

Josu Lavin (22.12.2007)
“Presidente de la Academia pro Lingua Romanica”

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.

Altere sitos de Wikia

Wiki aleatori